Máis de 200 empresas obrigadas a declarar emisións contaminantes

Cartaz de Daniel Iglesias Padrón

(A nosa terra) Medio Ambiente estuda novos sistemas de detección que 'poidan probar que o declarado polas factorías coincide co emitido'

Máis de 200 empresas galegas están obrigadas a declarar as súas emisións contaminantes á atmosfera e á auga no 'Rexistro Europeo de Emisións e Transferencias de Contaminantes' (E-PRTR), baixo o marco dunha normativa da Unión Europea pola que, dende 1996, elabórase anualmente un inventario das principais emisións e das fontes responsables.

Incorporación de 50 empresas

A novidade este ano é que unhas cincuenta empresas de Galicia se incorporan ao proxecto por primeira vez, entre elas, depuradoras, estaleiros, piscifactorías ou canteiras. Deste modo, súmanse ao sector enerxético, ao da refinaría, ao da industria de minerais ou do papel, entre outras, que xa estaban obrigadas por esta directiva comunitaria. Segundo informou a Europa Press a Consellería de Medio Ambiente, teñen de prazo ata o próximo mes de abril para declarar os contaminantes que emitiron o pasado ano 2007, aínda que os datos non se publicarán ata xullo. Así mesmo, incrementouse tamén o número de substancias que se consideran contaminantes, pasando de 50 a 91. Non obstante, as emisións de CO2 son as máis frecuentes en Galiza. De feito, en 2005 as empresas declararon ao redor de 20 millóns de toneladas de substancias contaminantes, das cales 19,5 millóns corresponderon a este gas.

Axudas

Nese sentido, o departamento que dirixe Manuel Vázquez insistiu en que "se se sabe onde están as maiores fontes de emisión se poderá actuar mellor para reducir a contaminación, así como apoiar e dar axudas ás empresas para que reduzan as súas emisións". Iso si, manifestou que estuda novos sistemas de detección que "poidan probar que o declarado polas factorías coincide co emitido".

(c+p) A Nosa Terra